Mate e talavou he vela
Fa’u ‘e Bruno Manu

NUKU’ALOFA: NA’E pekia ha ki’i talavou mei Ma’ofanga ‘i he ‘aho Tokonaki ko hono 6 ‘o e mahina ni´, tupu ia mei´ ha vela lahi ne hoko ki hono sino´.

Ko e talavou´ ni ko Latu Ngalu ta’u 14, na’e lolotonga foomu 1 ‘i he Kolisi ko Tupou´. Fakatatau ki he fakamatala ‘a e fâ’e ‘o e pekia´, Siutiti Ngalu. Na’e fai ‘enau fakakofi ki he ki’i timi pasiketipolo ka `oku ofi pe ki honau `api´, pea na`e `i ai pê mo e pekia´ `o fakafuofua ki he 7 pongipongi´. Na`e pehê foki `e Siutiti lolotonga `enau nofo ko `eni´ mo e a`u mai `a hono tuonga`ane ko Lupeni Pousini mo `enau fo`i Tokonaki ki he Sapate´. Na`a´ na talanoa ai `o lava ha ki`i taimi si`i mo e tukutaufetuli mai `a e pekia´ mo hono ki`i tuofefine, ka na`e `ikai pe te ne tokanga ki ai he ko `ena va`inga pê.

Na`e pehê `e Siutiti na`e lolotonga teuteu `a hono `ofefine lahi´ ke `alu `o ngâue, pea na`e hû ai `a e pekia´ ki honau loto fale´ ke kole ange `a `ene pasikala ke kumi mai. Na`e talaange ai `e hono tuofefine´ ke tatali ki he Mônite´ ke toki kumi ai fakataha mo e pasikala `a hono ki`i tehina´. Pea hû atu `a hono tuofefine´ `o `alu ai pê ia mo Lupeni `o tuku ia ki he ngâue´. Na`e lue mai ai `a Siutiti `o pô talanoa mo e tokotaha `a honau kaungâ`api´, kae tu`u ia `o situ`a ki he matapâ `a honau fale´. Lolotonga `ena talanoa´ mo e ofongi mai `e he tokotaha `i he kaungâ`api´ ko e tokotaha `oku vela. Na’a´ ne tafoki ai ‘o sio ki he pekia´ `oku lele mai pe mo e kaikaila´ `o puna kitu`a mei´ he matapâ `a honau fale´ ‘oku puho ‘a hono sino´. Na`e lele atu ai `a Siutiti mo ha tasipini vai `o hua`i `i he pekia´, `a ia ko hono vala´ kotoa na`e vela´.

Na`e fai ai ha kumi tokoni `o leleaki`i `a e pekia´ ki falemahaki, na`e nofo ai `a e pekia´ mo `ene fa`ee´ `o meimei lava ha uike `e taha mo e konga pea hiki ai pê `a e pekia´.