Ngaue fakamisinale toko 7 ki Uganda
Fa’u ‘e ‘Ulu’alo Po’uhila

“’Oku nau kei tokoto´ na,
Hangee´ ni ha sipi tukunoa
‘Ikai ha taha ke tauhia
‘ A e vaivai mo mahaki’ia..,”

Ko e kupu ‘ena e himi 597 ‘a e Siasi Uesiliana´ ia na’a ne fakalotoa ha to’utupu Tonga ‘e toko 7 kenau folau atu ki Uganda ‘i ‘Afilika ke fakahoko e Kosipeli´ ki he tukuhausia´, masiva´ mo e li’ekina´ e fonua´.

Neongo e faingata’a e ngaue ni ka kuo pole ‘a Patoni Liufau, Lopeti Hee, Melekapa Mafi, Lupe Filiai, Kevini ‘Oliveti, Mapaki Mahe mo Moala Fusitu’a kenau hopo atu ‘o fai e ngaue´ ni.

Ko e to’utupu ni na’a nau ako pe ‘i he University of the Nations ‘i Lafalafa´ ‘o fai ai honau teu’i ki he ngaue ko ‘eni kuo nau pole ki ai. Na’a nau ako ai he mahina ‘e 3 fekau’aki mo e misiona ngaue fakamisinale´, pea ko e mahina leva ‘e 6 ne nau ako makehe ai ki he tafa’aki ‘o e mo’ui´ mo e ngaahi mala’e kehekehe pe.

Fakatatau ki he fakamatala ‘a Moala Fusitu’a´ na’a nau ako pe pea kuo nau ongo’i ko e ui ‘eni ‘a e ‘Eiki´ ‘oku fai ma’a nautolu´ kenau oo atu ‘o fakamafola e kosipeli´ ki he feitu’u ni.

“’ Oku mau ‘osi ‘ilo pe e pole mo e faingata’a e ngaue ‘oku mau pole ki ai´ ka ‘oku mau tui pe ko e ui ‘eni ‘a e ‘Eiki´ ma’a mautolu´,” ko Moala ia.

Na’a ne pehee ko ‘enau visone mo e taumu’a ko ‘eni´ kenau oo ‘o ngaue ki he kau tukuhausia he ve’e hala´ mo feinga’i ha fale hufanga ke tanaki ki ai e kau tukuhausia´ mo e masiva´.

Ko e taha e palopalema ‘oku nau fepaki mo ia´ ko e tafa’aki fakapa’anga ‘enau ngaue´. Na’e pehee ‘e Moala ‘oku nau fua pe ‘enau fakamole´ ‘o kau ai ‘a e totongi folau´ pea pehee ki he fakapa’anga ‘enau nofo faka’aho´.

“’ Oku mau ‘alu pe he malumalu ‘o e kautaha Youth with a Mission ka ‘oku mau fua pe e fakamole´,” ko e lau ia ‘a Moala´ mo ‘ene fakafuofua ‘oku pa’anga ‘e toluafe tupu e tikite folau ‘a e tokotaha ki Uganda tukukehe ai ‘enau ngaahi fakamole kehe´.

Ko ia ne fai ai ‘e he kulupu ni ha ngaahi feinga pa’anga kehekehe ke fua’aki e fakamole ‘enau ngaue fakamisinale ‘oku fai´. Na’a nau hiki ai ‘enau fo’i ‘alapama CD hiva ko e Kelesi Tomu’a´ ‘a ia na’e tuku atu ia ‘i Tonga. Pea ‘oku folau mai ai ‘a Moala fakataha mo Patoni, Lopeti mo Lupe Filiai ki Nu’usila ni mo ‘enau vaeu’ai koniteina manioke ke fakatau atu ke tokoni ki he’enau folau´. ‘Ikai ke ngata ai´ ka ko e taleniti ta tapa’ingatu ‘a e ongo talavou ko Patoni mo Lopeti´ ‘oku tafe mai mei ai ‘a konga e pa’anga´. Ko ‘ena me’a ‘oku fai´ ko e ta e tapa’ingatu´ ‘o fakatau atu pea ‘i ai mo e ni’ihi ‘oku nau ‘ota ha ngaahi tohi fakaafe pe kaati fai’aho, mali pe kilisimasi ‘oku fai kotoa pe ia ‘e he ongo tangata ni ‘i he tapa’ingatu´.

Ko e pole faingata’a ‘eni ‘a e to’utupu´ ni he ‘e tuku e kai makona´, honau ngaahi famili´ mo e maheni ka nau oo ‘o ngaue mo fiekaia fakataha mo e fanau tukuhausia ‘o Uganda. Makehe mei ai ko e feitu’u ni ‘oku lahi e ngaahi mahaki ai ‘oku ‘ikai ke ‘i Tonga ni ia ka ‘e ala uesia ai ‘enau mo’ui´ hangee ko e malelia´ mo e ngaahi mahaki kehekehe pe.

‘I hono fakafehu’i ‘a Moala´ na’a ne pehee ‘oku nau ‘osi ‘ilo kotoa pe e ‘uu´ ni me’a ko ia´ ka ‘ou nau kei pole pe ke fai e ngaue ‘a e ‘Eiki´. Ko ‘enau folau ko ‘eni´ ‘oku ‘ikai toe si’isi’i hifo he ta’u ‘e 1 ka ko e tokolahi taha ‘iate kinautolu´ ko ‘enau taketi´ kenau ngaue ai he ta’u ‘e 5 pe lahi hake, ‘o tatau ai pe pe tenau hoko ‘o kelekele’aki ‘a Ugand ka ‘oku nau fai pe ‘i he huafa ‘o e ‘Eiki huhu’i´.

Ko ia ka ‘i ai ha’o fietokoni ‘o fakatau e manioke ‘a e to’utupu ni pe ha fa’ahinga tokoni pe ke ke fetu’utaki ki he telefoni 275 0291 pea ki Tonga ke fetu’utaki ki he 32 - 340 pe 31 985.

‘Oku mafola atu foki ‘i mamani ‘a e tokolahi e to’utupu Tonga´ ‘i he ngaue fakamisinale tatau ‘i he malumalu ‘o e kautaha Youth with a Mission. ‘Oku ‘i ai e ni’ihi ‘oku nau ‘i Kenya, Singapore, Taiwan, ‘Initia mo Siaina.