Tohi ki he ‘Etita

Lahi ‘etau lea, ‘Eseta

Tangata’eiki,

‘Oku ou loto ke tu’u heni ke tala ki he fanau ‘a Talo Lakepa Fulivai´, tuku ho’omou fieme’a he ‘e kei Lupepau’u pe ‘a Lupepau’u ia “no matter what”. Te mou kei pakupaku pe koe - Salamo, Temaleti Faka’osi, pea mo Toa; pea ki a ‘Eseta Fusitu’a, feinga ke totongi ho’omou ‘uu mo’ua ki he kakai´, he ‘enau fanga puaka na’e ‘omai ke fai’aki ‘a e fiehaa´, kae si’i fiu kumi holo kimoutolu ‘e he kakai´ ke totongi ‘enau fanga puaka´. Ko e tupunga ‘eku lea´, ko ‘eku ‘ita ho’o tala te ke faka’ilo kimautolu he ‘oku mau fakamatala holo e mali ‘a ‘Ulu mo Lupe.

‘Eseta, tuku aa ho’omou fie valeloi´ na’a mou ‘osi ‘ilo pe feitama ‘a Lupe´, he na’e faka’ofa ‘a e ta’ahine´ he’ene telefoni ange ki a Mata’i’ulua, ‘o ‘eke ange pe ‘e fefee ‘a e ‘api´. Kaila mai ‘a Salamo ke tapuni e telefoni´ he ko e mali´ ‘oku fai ‘apongipongi, pea ka pehee ke tuku pea tuku. Faka’ofa e ki’i ta’ahine´ hono pehe’i´. Ko e anga ia e talangata’a.

Ko e me’a ia na’e tala ke tuku e holi´ he ko hono ‘ai´ e kuo hanga ‘e he Lupe´ ‘o ‘ai ke mou fata e fu’u fala mo e ‘api loi, ke mou nofo’aki ‘o pa ‘a ngangalu, ho’omou fo’i pato´, ta’e’ilo kuo ‘ela ‘a Lupe ia mo e fua´, pea mou toki ‘omi ‘a e famili ‘o e Tu’i´ mo e Kuini´ ‘o ‘ela ko e tali ke fai ‘a e ‘api´. Pea talolo ‘a e fanga tokoua ‘o e Kuini´ kae fievaleloi pe ‘a ‘Eseta mo hono fanga tokoua´.

‘I he hoko ‘a e 2 hengihengi, kuo ui mai ki he fanga tokoua ‘o e Kuini´ ke nau oo hake ‘o fe’iloaki, he kuo sio ‘i mamani ‘a e ta’ahine´. Ta, koee kuo fuoloa ‘ene sio ‘ana ia ‘i mamani.

Ko e ha leva ‘a e me’a ‘a ‘Eseta na’e pelu he pongipongi´ ‘o takai he fala´ pea teu e kainga´ mo e fu’u ifi ‘a e kau polisi´, pea talolo mo e fu’u fanga puaka ke fai ‘a e holo ki Palasi. Faka’ofa e Kuini´ mo e Tu’i´ mo Tuita´ he talangata’a ‘a e ta’ahine´.

‘Eseta kapau ‘oku ke loi ‘i he anga fakafonua´, feefee ho’o loi ki he kakai ‘o e fonua? Ko e me’a ia ‘oku ‘ai ai ke mou ta’ofi e pepa´ ko e fakamatala atu ho’omou loi´, pe ko e fai ke a’u ki fe ‘a e loi´. Te ke masiva pe koe ko e lahi e lohiaki’i e kakai´, pea ‘oku ‘ikai pe ke ke poto he ‘oku ke fu’u fiema’u ‘e koe kimautolu, pea kuo poto ‘a e kakai´ kuo nau ‘alu ‘o kumi ha’anau mo’ui he kuo ‘ikai ke toe ‘aonga ke nofo pe ‘o te’e ‘i he kau ma’olunga´, ke nau nofo pe ‘o tali ‘a e katoanga´, pea toho ai pe si’i kakai´ ‘o hangee ko e fu’u mali fakahisitolia ‘a ‘Eseta na’e toki fai´.

Kuo hanu e kakai´ he te’eki totongi e fu’u mo’ua he ngaahi me’a na’e fai’aki e mali´. Maloo mo e poto ‘a ‘emau matu’a´ ‘o ‘omai kimautolu ki muli ‘o mau nofo fonua ai. Kapau na’a mou tokanga ke fakatotolo’i ‘a e pa’anga mole ‘a Tonga´ kae tuku noa’i ‘a e pepa´ ia, ka ‘oku ‘ikai ke mou kataki’i ‘a e ‘alu tonu e fakamatala’i atu e faihala ‘a e kau taki ‘o e fonua´.

‘Oku laka ange ‘a e kau ngaue live-in ia heni ‘a e kau Tonga´ ho’omou ako mata’itohi fakapiko.

Tu’a’ofa atu,

Lahi-’etau-lea

USA.