‘Asi ‘a ‘Akosita ‘i Hawkesbay

‘ I he efiafi Tokonaki´ na’e tuku atu ai ‘e he sea e Komiuniti Tonga ‘o Hawkesbay, Tevita Faka’osi ha fakatokanga ki he kainga Tonga he feitu’u ni ‘i he letio Kidnapper ‘o fekau’aki mo e fefine Tonga ko ia ko ‘Akosita Folau Hickey.

‘I ha fepotalanoa’aki telefoni mo Tevita na’a ne pehee na’e sio he nusipepa Taimi ‘o Tonga´ ‘i he ongoongo fekau’aki mo e fefine ni ‘a ia ‘oku ne ‘ilo ‘oku ‘asi holo ‘i Hawkesbay. ‘Ikai ke ngata ai´ ka ‘oku ne toe fai mo e ngaahi ngaue natula tatau mo ia ‘oku kei kumi holo ai ia ‘e he ngaahi famili ‘i ‘Okalani´ koe’uhi´ ko ‘enau ngaahi fiema’u faka’imikuleisoni na’a ne ngaue ki ai ka kuo ‘osi totongi atu kiate ia ha lau afe.

“’ Oku ‘i heni e fefine ni, ‘asi holo heni pea kuo kamata ke ‘asi ‘ene fai e me’a tatau mo ia na’a mou lipooti mai na’a ne fai ‘i ‘Okalani´... Na’a ku lele’i lahi he letioo´ ke fakatokanga ki he kakai´ fekau’aki mo e fefine ni pea ‘oku ou ‘ilo ‘oku hola holo,” ko Tevita ia.

Na’a ne pehe na’e ‘ohovale ia ‘i he fetu’utakiange ‘a e potungaue Child Youth and Family ‘o fekau’aki mo ha fanau ‘a ha tangata Tonga (tukuaki’i ‘oku tuonga’ane’aki ‘e ‘Akosita) ka kuo ne mavae mo hono mali´. Na’e fai atu e ngaue´ ‘o ne ‘ilo ‘oku ‘i ai e kaunga ‘a ‘Akosita ki he me’a ni ‘a ia ne ‘i ai e tokotaha na’a ne tala ki he Potungaue´ ‘a e tu’unga ‘oku ‘i ai e ki’i fanau ko ‘eni´. Na’e kole leva ‘a Tevita ki he Potungaue´ ke tatali e me’a ni he ‘oku ne ma’u e ngaahi fakamatala ‘o fekau’aki mo ‘Akosita. Na’a ne ‘oatu ai e tatau ‘o e nusipepa ni mo e taa ‘o ‘Akosita ‘o talu ai hono toe ta’ofi ‘e he potungaue CYF e ngaue ki he ki’i fanau ‘a e tangata ‘oku taku ko e tuonga’ane ‘o ‘Akosita´.

“’ Oku ‘ikai ke u tali ‘e au e omai ‘o ‘ai’ainoa’ia heni´,” ko e lau ia ‘a Tevita´.

Na’a ne pehee ne ‘asiange e kakai mei ‘Okalani ki honau feitu’u´ ‘o fakalele e ngaahi polokalama ako laiseni ke ma’u e laiseni faka’uli ‘a e kakai Tonga´ kae totongi. Ko e polokalama ko ‘eni´ ‘oku lele faka-Tonga pe ia pea ‘oku tala faka-Tonga pe ‘e he kakai ia ko ‘eni´ e tali tonu´ ‘i he sivi´ ki he tokotaha ‘oku sivi laiseni´ lolotonga e sivi tohi´.

“Na’a ku lele’i lahi ‘eni he letioo´ pea kuo nau puli atu.”

Na’e pehee ‘e Tevita ko honau feitu’u´ ‘oku lahi ai e ngaue faama´ pea ‘oku lataange ki ai e kau ‘ova´ pea kuo kamata ke ‘asiange mo e fanga ki’i kau ngaue faka’imikuleisoni Tonga ke ‘a’au honau kato´.

Ko ia ‘oku ngaue leva ‘a Tevita ‘a ia ko e fakafofonga Justice of Peace pea mo hono tokoni´, Saia Tu’akalau ki hono fakafonu mo fai e ngaue ke tokoni’i e me’a faka’imikuleisoni ‘a e kainga Tonga he feitu’u ni.

“’ Oku ma fai ta’etotongi pe e ngaue´ he ko e palopalema pe ‘oku fekuki mo hotau kainga´ ko e lea´ (English) ka ‘oku ‘ikai kenau ‘ilo ko e me’a ia ko ia´ ‘oku faingofua pe ‘oku fakafonu pe ‘o fakahu hangatonu,” ko e lau ia ‘a Tevita´.

‘Oku lahi foki e kau fakafofonga ia ‘oku nau ‘oatu ha totongi ‘oku lauafe ki he kakai´ ka nau fai e ngaue ki hono fakafonu mo fakahu ‘enau ngaahi me’a faka’imikuleisoni´. Ko e founga tatau ne fakahoko ‘e ‘Akosita ‘a ia ‘oku kei kumi holo ai ‘e he ngaahi famili Tonga ‘i ‘Okalani ni ke fakafoki mai ‘enau silini. Ko ‘eni kuo ma’u e fakahaa ‘oku ‘asi ia ‘i Hawkesbay ‘o ne toe fai e ngaue natula tatau.

Na’e pehee ‘e Tevita ‘oku ne tui ‘e toe hola ‘a ‘Akosita mei Hawkesbay ki ‘Okalani pe ko ha toe feitu’uange he kuo ‘ilo ‘ene me’a ‘oku fai´.

Ne fai e feinga kia ‘Akosita ka ne ‘ikai ke ma’u.