Trolley fo‘ou ‘a mala‘e vakapuna
Fa’u ‘e Taina Kami Enoka

KO E me’a fakafiefia ki he kau pâsese ki tu’apule’anga´ mo e kau folau mai ki Tonga ni´, ‘i he lava kenau ngâue’aki ‘a e ngaahi saliote fo’ou, ‘a ia na’e foaki ‘e he Kautaha Fund Management ki he Potungaue Sîvile´ ‘i he Tu’apulelulu´.

Ko e saliote (trolleys) ‘e 35 na’e foaki ‘e he pule lahi ‘o e kautaha´, Robina Nakao, ki he sekelitali le’ole’o ‘o e Va’a Sîvile, Kaitu’u Fotu, mo e tokotaha fale’i fakalao ‘o e Potungaue ni, Tevita Havea. ‘Oku fe’unga ‘a hono mahu’ing´a mo e T$18,000. ‘E hokohoko atu ‘a e tokoni ko eni´ ‘i he ta’u ‘e tolu ka hoko mai´, kae ‘oua leva ke a’u ‘o teau ‘a e lahi ‘o e ngaahi saliote fo’ou ‘i he mala’e vakapuna fakatu’apule’anga ‘o Fua’amotu´.

Na’e pehê ‘e Tevita ko e ngaahi saliote na’e lele mai’aki ‘i mala’’e vakapuna´, ko e ngaahi saliote motu’a ia ‘a e mala’e vakapuna ‘o ‘Aokalani´. Pea ko e toki tokoni eni ha kautaha ki hono fakalahi ‘a e ngaahi saliote´.

“ ‘Oku mamafa ‘a hono totongi´, pea ‘oku ‘ia mautolu ‘a hono tauhi ‘a e ngaahi saliote´,” ko e lau ia ‘a Tevita.

Na’a´ ne pehê ko e tokoni eni ‘a e Kautaha Western Union ki he lelei ‘a e kau pâsese, pea ‘oku hounga ki he Va’a Sîvile ‘a e tokoni ‘a e kautaha´ ni.

Na’e pehê ‘e Robina ‘oku fakasio ma’u pê ‘e he kautaha Fund management Ltd, ‘a ia ‘oku ‘o’ona ‘a e Western Union, Avis Rentals, mo Taufonua Travel, ha ngaahi founga ke tokoni ai ki he komiunitî.

“Ko e founga eni ‘oku hâ ai ‘a ‘emau hounga’ia ‘i he ngaahi poupou kuo mau ma’u mei he kakai,” ko e lau ia ‘a Robina.