Ikuna ‘e Maryan Lomu e fe‘auhi Face of Tonga
fa’u ‘e Manu Manuofetoa

NA’E ikuna ‘e he ki’i finemui ta’u 19 mei Lofanga, Kolomotu’a pea mo Longolongo ko Maryan Lomu ‘a e fe’auhi ki he fefine fofonga faka’ofo’ofa taha ‘o Tonga ki he ta’u 2003, ‘a ia na’e ‘iloa ko e fe’auhi Face of Tonga.

Ko e finemuí ni ‘oku ‘ikai sola ia ki he tokolahi tautautefito ki he fânau akó he ‘oku taku ia ‘e he ni’ihi ko e Princess ‘o e Kolisi Kuini Saloté pea ‘i he vâhenga Longolongó ko e tokolahi ‘oku nau ui ‘a e ki’i finemuí ni ko e fo’i siueli ‘o e Tavatu’utolú.

Kaekehe ko e ko e fe’auhí ni na’e fakahoko ‘i he Tu’apulelulu mo e Falaite kuo’osí ki he International Dateline Hotel pea na’e fe’unga mo e kau fakafofonga ‘e toko 12 ne nau veipâ pê kohai ‘e hoko ko e matala’i lose ‘o e ‘Otu Felenité ‘i he ta’u 2003.

Ko e ua ‘i he fe’auhí ni na’e hamusi ia ‘e he ki’i finemui fofonga fiefia mo mata malimali ‘o loto Kolomotu’á ko Marie G. Holani. Na’e fika 3 ‘a Talaimani Kaho pea toki fika fâ hake leva ‘a Toa Cocker.

Na’e kamata ‘a e fe’auhí ni ‘i he efiafi Tu’apulelulú ‘a ia ne faka’ali’ali ‘e he kau finemuí ni ‘a e ngaahi vala faka-tonga pehê ki he ngaahi faiva. Na’e mahino foki mei he fuofua ‘asi ko’eni ‘a e kau finemuí ni ‘a ‘enau mateuteu ki he fe’auhí koe’uhí ko e toki fuofua taimi ‘eni ke nau kau ai ki he fe’auhi pehê.

Kaekehe ‘i he ‘osi ‘a e pô ‘uluaki ‘o e fe’auhí na’e te’eki ai pê ke mahino ‘a e tokotaha te ne ikuná. ‘I he pô faka’osí leva ne toki lîlî’osi ai e kau finemuí ‘i mu’a he matangá mo e kau fakamaaú kimu’a pea toki fakahâ ko ia e olá ‘o mahino ai kuo ikuna ‘e Maryan Lomu ‘a e fe’auhí.

Ko hono ikuna foki ko’eni ‘e Maryan ‘a e fe’auhí ni ‘oku ‘ikai ke pehê ko ha ikuna faingofua na’á ne fakahokó he na’e ‘ikai ngata pê ‘i he tokolahi ‘a e kau fe’auhí kâ ne meimei ko e ngaahi fo’i matala’i lose kotoa pê kinautolu. Na’e lava foki ke tala ‘eni mei he kau fakamaaú he na’e fihi ‘aupito ‘enau fai tu’utu’uní neongo ne nau iku ‘o lototaha kotoa ke foaki ‘a e ikuná mo e pale ‘uluakí kia Maryan.

Kaekehe ko e pale ‘o Maryan ko e Ipu ‘o e fe’auhí fakataha mo e tikite folau ki ‘Okalani. Na’e toe ‘i ai foki mo hono tekiteki ko e pa’anga ‘e $300 pehê ki he vausia pa’anga ‘e $200 ki he fakatau vala. Ko e pale ‘o e fika uá Marie G. Holaní ko ha pa’anga ‘e $200 mo e vausia pa’anga ‘e $100 ke fakatau vala pe naunau sipoti mei he Kautaha Sônasí. ‘Oku toe ‘oange foki mo e faingamalie nofo ta’etotongi pô ‘e 3 ‘i he Royal Sunseet Resort ki he toko 2 pehê ki he vausia vala pa’anga ‘e $150.

Ko e pale ‘o e fika tolú Talaimani Kaho ko e pa’anga ‘e $150 fakataha mo e vausia vala pa’anga ‘e $100, pea ko e pale fika 4 na’e ikuna ‘e Toa Cocker ko ha pa’anga ‘e $100 fakataha mo e vausia vala pa’anga ai pê ‘e $100.

Ko e tu’o ‘aki ‘eni ‘a hono fakahoko ‘o e fe’auhí ni ‘a ia na’e kamata ‘i he ta’u kuo’osí ‘o a’u mai ki he ta’ú ni. Na’e fakahâ ‘e he Palesiteni ‘o e Komiti Face of Tonga Kerry Mataele ‘a ‘enau fiefia mo e komití ‘i he mahino ‘oku fai poupoua ‘e he mâtu’á kae’uma’â e ngaahi kautaha pisinisí ‘a e fe’auhí ni.

‘Ikai ko ia pê kâ ‘oku toe fakafiefia ki he komití ko e mahino ko ia kuo nau a’usia ‘a e taumu’a ngâue ne fokotu’u ‘aki ‘a e fe’auhí. Ko e taha foki e taumu’a tefito ‘o e fe’auhi Face of Tonga ko e feinga ko ia ke hu’ihu’i atu ‘a e me’a ko e mâ kae ohi mai ‘a e fa’ahinga to’onga matakakaí ‘i he taimi ‘oku fakahoko ai ha fa’ahinga fe’auhi fakatokolahi pehé ni.

‘Oku ‘uhinga ‘eni ki hono ako’i ‘a e fânau fefiné ke nau malava ‘o tu’u pê ‘iate kinautolu ‘o fai ha lea ‘i he ha’oha’onga ‘o ha kakai tokolahi ‘o ‘ikai ke nau mâ. ‘Oku fakatefito ‘eni ki he fânau fefine ‘i Tonga ní he ‘oku mahino ki he komiti Face of Tonga ko e ni’ihi ko ia ‘oku ‘i tu’apule’angá kuo nau ‘osi anga maheni kinautolu mo e ngaahi fe’auhi pehe ní.

Kaekehe ko e ta’u kuo’osí na’e ikuna ‘a e fe’auhi Face of Tonga ‘e ‘Akosita Havili ‘o Ha’ateihó pea ko e ta’ú ni ‘eni kuo ikuna ‘e Maryan Lomu. ‘I hono faka’eke’eke ‘o Maryan ‘e he Nusipepani na’á ne fakahâ ‘a ‘ene fiefia koe’uhí ko’ene a’usia ha tu’unga pehé ni ‘i he’ene mo’uí.

“Ko hono mo’oní ‘oku ta’e hano tatau ‘a ‘eku fiefiá koe’uhí ko’eku a’usia ha fa’ahinga mômeniti pehé ni ‘i he mo’uí,” ko Maryan ia mo’ene pehê kuo taimi ke tukutuku atu ‘e he fânau fefiné ‘a e mâ mo e laulaunoá kâ nau ‘unu mai ‘o faka’ali’ali ‘a e taleniti kuo fakakoloa ‘aki kinautolu ‘e he ‘Eikí.

Kaekehe ne fakahâ mei a Kerry Mataele ‘oku hokohoko atu ai pê ‘a e fe’auhí ni ‘i he kaha’ú pea ‘okú ne fie fakaa’u ‘a ‘ene fakamâlô mo e komití ki he ngaahi kautaha ne nau tokoni ki hono fakapa’anga ‘a e fe’auhí.