|
Fakamanatu
ta‘u 40 ‘o e ‘Apiako ‘Atenisi´
NA’E fakahoko mai ki ‘Aokalani Nu’usila ‘a
hono katoanga’i ‘o e ra’u 40 e ‘apiako ‘Atenisi´.
Ko
hono fuofua lotu’i ‘o e ‘aho´ na’e fakahoko
ia ‘i he Falelotu Lotofale’ia´ ‘i Mangere ‘i he
Tokonaki, ‘aho 6 ‘o Tisema´.
Na’e malanga’i e ‘aho´ ‘e he Faifekau Seniale ‘o
e Siasi Fakatahataha´ ko ‘Ilomaisini Lea ko e tokotaha ia ‘o
e kau Kolisi Tutuku ‘o e ‘apiako´. Na’e tokoni foki ki
he malanga´ ‘a e Kolisi Tutuku ko Faifekau Salesi Fakatulolo,‘o
e Siasi Konisitutone´ pea toki huufi e malanga´ ‘e he Palesiteni ‘o
e Siasi Fakatahataha´ ko Holani‘Ofa. Ko e ngaahi himi´ na’e
lau ia ‘e Lolohea Muli, Vasiti Hema Tu’amoheloa pea mo Taiana Helu.
Na’e lau e lesoni´ ‘e Moi Kaufononga pea mo Tevita Falala.
Na’e tataki e ouau ‘o e malanga´ ‘e Malekamu Manu moe
kau hiva Kolisi Tutuku Tangata ‘o Lotofale’ia´.
Na’e hoko atu ki ha talitali na’e fakahoko ‘e Lu’isa
Halasili, Lita Kolo, Panitita Helu, Fehokonahau, ‘Aiveni, Maikolo Taufa,
Lopeti Lafo’ou, Lopeti Helu, mo Lupeti Ngaluafe pea mo e Kolisi Tutuku ‘o
e vahe ‘Okalani´ pea na’e taa ai mo ’enau lakalaka ko
e fatu ta’anga ‘a Kuini Salote ‘oku ‘iloa ko e Nailasikau´.
Na’e fakahoko ‘a e lea talitali´ ‘e he Palesiteni ‘o
e Kolisi Tutuku´, Setaleki ‘Opeti ‘Ofamo’oni, pea tataki
e ouau fakame’ite´ ‘e he Setuata ‘o Lotofale’ia´,
Moi Kaufononga pea tokoni ki ai ‘a Heamasi Halasili mo ‘Amini Vuki.
Na’e lava mai foki mei Tonga ‘a e Talekita ‘o e ‘Apiako´,
Futa Helu pea mo hono hoa´ Kaloni, mo e Sea ‘o e Poate Talaasiti ‘o
e ‘apiako´, Mahe Taloa pea mo ha ongo memipa ‘o e Poate´,
Fononga Tu’ipeatau mo Paea Kolo.
Na’e lava mai foki mo Tanusia-ki he-Lotu (Taniela Vao) ‘o fakafofonga
mai ‘a e Kau Kolisi Tutuku mei Wellington. Na’e lava mai foki mo
e kau fakafofonga mei´ he ngaahi Kolisi Tutuku´ hangee ko e Kolisi
Tonga´, Kolisi Sa ‘Anitelu´, Kolisi ko Tupou´ pea mo
e Tonga High School.
Na’e fakaava’aki foki e katoanga´ ha konifelenisi he ‘aho
Tu’apulelulu´ mo e Falaite´ kuo ‘osi´ ‘i
he Tamaki Campus ‘o e ‘Univesiti ‘Okalani´ ‘a ia
na’e fakaava ia ‘e Dr. Tupeni Baba mei Fisi ‘a ia ko e faiako
pe ‘i he ‘Univesiti ‘Okalani´.
Na’e kau atu ki he kau lea ‘o e konifelenisi´ mo ha ni’ihi ‘o
e kau maateaki ‘oe Komiuniti Tonga ‘i ‘Okalani´ hangee
ko Faifekau Kilifi Heimuli.
|
