Ta‘efai ‘a Sangster ki he aleapau´
Fa’u ‘e ‘Ulu’alo Po’uhila

NA’E totonu ke kamata he ‘aho 17 ‘o Novema´ ‘a e hopo ‘a e tangata pisinisi ‘iloa ‘i Tonga mo fakafofonga fika 2 e kakai ‘o Tongatapu´ ki he fale alea´, Dr. Feleti Sevele pea mo e ‘Etita e nusipepa Tonga Star, Sangster Saulala ko e ‘eke’i ‘eni ‘e Feleti hono ongoongo´. Kae kimu’a ke a’u ki fale hopo´ na’e kole ai ‘a Sangstar mo ‘ene fakafofonga Lao´, William Edwards ke fefee kenau fakalelei pe ‘i tu’a´ kae ‘oua ‘e toe a’u ki he fakamaau’anga´.

Ko e alea´ leva ke totongi ‘e Sangster ‘a e pa’anga ‘e uamano ki a Feleti ko e maumau kuo hoko ki hono ongoongo´ tu’unga he Tohi ‘Etita na’e paaki mai ‘e Sangster ‘i he’ene nusipepa´ kae hili ko ia´ ‘oku ta’emo’oni e ngaahi tukuaki’i ko ia´. ‘Ikai ke ngata ai´ ke totongi ‘e Sangster e fakamole ‘a e loea ‘a Feleti´, Laki Niu ‘a a ‘oku pa’anga mo ia ‘e tahamano tupu.

Na’e toe felotoi foki e ongo fa’ahi´ ke paaki leva ‘e Sangster ha kole fakamolemole ‘i he Tonga Star ‘o fekau’aki mo e me’a ne nau paaki ‘o maumau ai e ongoongo ‘o Feleti´.

‘I ha fetu’utaki ‘a e nusipepa ni kia Feleti´ na’a ne fakapapau’i mai ‘oku mo’oni e alea ko ‘eni´ pea na’e kole ‘a Sangster mo ‘ene loea´ ke totongi fakakongokonga pe. Na’e totonu ke kamata e ‘uluaki totongi´ he ‘aho 30 ‘o Novema´ ka ko e pango´ ne a’u mai ia ki he ‘aho Sapate 7 ‘o Tisema ni ‘oku te’eki pe ke totongi ha me’a ia ‘o fakatatau ki he felotoi ne fai´.

‘Oku mahino foki ki he nusipepa ni ‘oku ngaue atu e loea ‘a Feleti´ ki he me’a ni koe’uhi´ ko e ‘ikai ke faipau ‘a Sangster ki he aleapau ne nau felotoi ki ai´.

Ko e tohi ‘Etita ko ia ne paaki ‘e Sangster na’e fakamo’oni ki ai e tokotaha ko ‘Ate Fulufulu ‘o ne fai ha ngaahi tukuaki’i mamafa mo ta’emo’oni ‘a Feleti. Na’e kau foki ‘i he faka’ilo ko ‘eni´ ‘a hono fiema’u ke fakaha ‘e Sangster e hingoa totonu ‘o ‘Ate Fulufulu´ ka ne ‘ikai lava kotoa ia tu’unga ‘i he alea ke nau fakalelei’i pe ‘i tu’a´.

Na’e fai e fetu’utaki kia Sangster ka na’e ‘ikai ke tali mai ‘ene telefoni´ pea na’e tuku pe ai e fekau, ka ne ‘ave e pepa ni ‘o paaki´ ‘oku te’eki pe ke fetu’utataki mai ‘a Sangster ia.