Langi Fetu'ua

Malu'aki 'a e pô he langi fetu'ua
kau visone loto ki si'o founga
ne u fika fakapoto pea teolosia
fakatu'unga fasi pea komipiuta
'Isa ta ko e polo'i 'o 'Atonai ia
Folau he peau ke tala ai ho Mafí na

Longo noa e 'utu fa'a longoa'á
'ai tauanga'a e heilala 'o Lotopohá
He kuo pulonga e taulanga Nâfanuá
Folau hola si'i 'ofa'anga tonungá
Ko e siale he vaó na, kulutuma he tele'a
ka ne fili pê tokua ko si'ao 'ofa'anga

Tisaipale 'ofa mo'ui mateaki
si'o 'oho fononga ko e katakata malimali
ho'o tala tûkuhua kuó u ako 'aki
tau lotu pê mo 'ûkuma he kolosi kuo foaki
tokaange ha taimi tau fakafe'ao 'i langi
'osi e ongosia,fiefia he 'api 'o e Tamai

Funga Lototo ke talia mai mu'a
Si'i folau paea mei he hala koula
fakaloloma e 'api ko Falehûfanga
tengihia e 'akau tu'utaha 'i mo'unga
e'a si'emau nofo paea 'i he vahanoa
Mailau ko e kava e kuo fû ia ki moana.

Fakamolemole pê 'a e Taha'i Tolú na
'ikai ha tâlafili pe ha launga
ki he pule mâ'oni'oni 'a e Feitu'una
'Amusia 'a Hêvani mo e kau holomu'á
mâta me'a masani he 'Alofi 'o e Haú na
si'i 'anauá ni ko e muna 'o e muna

Manatu 'ofa kia Maloti Maama 5/24/62 - 2/20/95
Dedicated to my beloved sister Loti.
Fa'u 'e 'Ivoni Maama - utulongoaa@yahoo.com